Politika e Privatësisë

Përditësuar më 4 korrik 2026 · Vlen për aplikacionin Spika (iOS dhe Android) dhe faqen getspika.app

Spika operohet nga Albi Zeqiri, me adresë në Elbasan, Shqipëri („ne"), i cili është kontrolluesi i të dhënave të tua personale sipas ligjit nr. 124/2024 „Për mbrojtjen e të dhënave personale". Për çdo pyetje rreth privatësisë na shkruan te kontakt@getspika.app.

Shkurt, në shqip të thjeshtë

Spika s'të kërkon kurrë emrin real dhe nuk ka reklama, gjurmim apo shitje të dhënash. Postimet, komentet dhe reagimet i bën edhe pa llogari fare. Vendndodhja e një posti është ajo që zgjedh ti vetë në hartë — GPS-i yt nuk gjurmohet kurrë në sfond. Postet publike i sheh kushdo; chat-in privat e shihni vetëm ju të dy. Llogarinë e fshin vetë nga aplikacioni kur të duash. Më poshtë e njëjta gjë, me detaje.

1. Çfarë të dhënash përpunojmë

Edhe pa llogari:

• Një ID pajisjeje — një kod (UUID) që e krijon vetë aplikacioni në hapjen e parë. Nuk është numri serial i telefonit, as ID e reklamave. E përdorim për kufijtë e postimit, sigurinë dhe dërgimin e njoftimeve.
• Viti i lindjes që deklaron në hyrje — ruhet vetëm në pajisjen tënde, jo në serverët tanë, përveçse kur krijon llogari.
• Përmbajtja që krijon: postet (bashkë me vendndodhjen e zgjedhur dhe emrin e vendit), komentet dhe reagimet.
• Zonat që ndjek dhe, nëse i lejon njoftimet, token-i i njoftimeve push i pajisjes.
• Raportimet që bën për përmbajtje të tjera.

Kur krijon llogari (me Google ose Apple):

• Email-i i llogarisë Google/Apple — përdoret vetëm për të identifikuar llogarinë tënde; nuk shfaqet kurrë publikisht dhe nuk përdoret për marketing.
• Pseudonimi që zgjedh vetë dhe viti i lindjes.
• Mesazhet private, kërkesat e chat-it („Isha unë" / „Kërko chat") dhe lista e përdoruesve që bllokon.

Automatikisht:

• Kohët e krijimit të përmbajtjes dhe verdiktet e moderimit automatik (shih pikën 5).
• Të dhëna teknike kalimtare (p.sh. adresa IP) që përpunohen nga infrastruktura jonë për siguri dhe funksionim normal.

Çfarë NUK mbledhim: emrin tënd real, kontaktet e telefonit, foto, vendndodhjen e pajisjes në sfond, ID reklamash, apo analitikë të palëve të treta. Spika nuk ka reklama.

2. Vendndodhja — si funksionon vërtet

Vendndodhja e një posti është pika që zgjedh ti vetë mbi hartë — mund të jetë ose të mos jetë vendi ku ndodhesh. GPS-i i pajisjes përdoret vetëm për ta hapur hartën aty ku je, vetëm kur ti e jep lejen, dhe kurrë në sfond. Kur publikon një post, vendndodhja e tij bëhet publike bashkë me tekstin — kjo është vetë thelbi i Spika-s, prandaj zgjidhe me mend.

3. Anonimiteti — çfarë do të thotë saktësisht

Kur poston „Anonim", pseudonimi yt nuk i shfaqet askujt publikisht — as te posti, as te komentet, as në njoftimet që marrin të tjerët. Megjithatë, përmbajtja mbetet e lidhur teknikisht me llogarinë ose pajisjen tënde në sistemet tona: kjo na duhet që ti të marrësh njoftime e kërkesa „Isha unë", dhe që rregullat të zbatohen ndaj kujtdo. Anonimiteti të mbron nga publiku — nuk të bën të padukshëm për sistemet tona kur shkelen rregullat ose ligji.

4. Përse i përdorim të dhënat

• Për të ofruar shërbimin — postet në hartë e feed, komentet, chat-i, njoftimet (ekzekutimi i marrëdhënies sonë me ty sipas Kushteve të Përdorimit).
• Për moderim dhe siguri — filtrimi i përmbajtjes, kufijtë e postimit, trajtimi i raportimeve, bllokimi i abuzuesve (interesi ynë legjitim për të mbajtur Spika-n të sigurt dhe detyrimet tona ligjore).
• Për njoftimet push — vetëm me pëlqimin tënd; e heq kur të duash nga cilësimet e telefonit ose duke çndjekur zonat.
• Për kontrollin e moshës 16+.

Nuk marrim vendime të automatizuara me pasoja ligjore për ty dhe nuk bëjmë profilizim për marketing.

5. Moderimi automatik — transparencë e veçantë

Çdo post dhe koment, para se të publikohet, kalon nga një kontroll automatik: një filtër i brendshëm dhe një vlerësim nga një model i inteligjencës artificiale (Claude, shërbim i Anthropic PBC). Për këtë qëllim, teksti që shkruan i dërgohet Anthropic-ut për vlerësim automatik; verdikti (lejohet / nuk lejohet, me arsyen) ruhet bashkë me postin. Përmbajtja e ndaluar shqyrtohet edhe nga një njeri. Nëse mendon se një vendim moderimi është i gabuar, na shkruaj te kontakt@getspika.app dhe e rishikojmë.

6. Me kë i ndajmë

• Me publikun: postet, komentet dhe reagimet e publikuara janë publike dhe shfaqen me etiketën „Anonim" ose me @pseudonimin — sipas zgjedhjes sate për secilin post.
• Me përpunues teknikë që punojnë vetëm sipas udhëzimeve tona dhe me marrëveshje përpunimi: Supabase (databaza dhe backend-i), Anthropic (moderimi automatik i tekstit), Expo (dërgimi i njoftimeve push), Google dhe Apple (hyrja në llogari, dërgimi i njoftimeve në platformat përkatëse, shpërndarja e aplikacionit), Cloudflare (faqja jonë web).
• Me autoritetet publike vetëm kur e kërkon ligji.

Nuk i shesim të dhënat e tua askujt dhe nuk i ndajmë me askënd për reklama. Me askënd, kurrë.

7. Transferimet jashtë Shqipërisë

Përpunuesit tanë teknikë mund t'i ruajnë të dhënat në serverë jashtë Shqipërisë (në Bashkimin Europian ose SHBA). Transferime të tilla bëhen me masat mbrojtëse që parashikon ligji nr. 124/2024, përfshirë klauzolat kontraktuale standarde me përpunuesit.

8. Sa gjatë i mbajmë

• Llogaria dhe profili: derisa ta fshish ti.
• Postet dhe komentet: qëndrojnë publike derisa të hiqen; kur fshin llogarinë, ato anonimizohen përfundimisht — shkëputen nga llogaria jote pa rrugë kthimi dhe mbeten si „Anonim". Nëse do heqjen e plotë të një posti tëndin, na shkruaj.
• Pin-i në hartë: zhduket nga harta pas 30 ditësh (posti mbetet në feed).
• Mesazhet private: fshihen kur fshihet llogaria jote.
• Regjistrimi i pajisjes: sa kohë e ke aplikacionin; masat e ndalimit (ban) ruhen edhe më gjatë, se përndryshe nuk do të kishin kuptim.
• Raportimet, verdiktet e moderimit dhe përmbajtja e hequr: aq sa nevojitet për sigurinë e komunitetit dhe detyrimet ligjore.

9. Të drejtat e tua

Sipas ligjit nr. 124/2024 ke të drejtë të kërkosh akses në të dhënat e tua, korrigjimin e tyre, fshirjen, kufizimin e përpunimit dhe të kundërshtosh përpunimin. Këto kërkesa i bën falas te kontakt@getspika.app dhe përgjigjemi brenda 30 ditësh. Ke gjithashtu të drejtë ankese te Komisioneri për të Drejtën e Informimit dhe Mbrojtjen e të Dhënave Personale (idp.al, Rr. „Abdi Toptani", Nd. 5, 1001 Tiranë).

10. Mosha

Spika është vetëm për persona 16 vjeç e lart. Nëse mësojmë se një përdorues është nën 16, e heqim llogarinë dhe përmbajtjen përkatëse. Nëse je prind a kujdestar dhe beson se fëmija yt nën 16 po e përdor Spika-n, na shkruaj te kontakt@getspika.app.

11. Siguria

Të dhënat udhëtojnë të enkriptuara (HTTPS/TLS). Databaza mbrohet me kontrolle aksesi në nivel rreshti, ku përmbajtja private (p.sh. mesazhet) lexohet vetëm nga pjesëmarrësit e saj. Aksesi administrativ është i kufizuar në minimumin e nevojshëm.

12. Faqja getspika.app

Faqja jonë është statike dhe nuk përdor cookies gjurmimi apo analitikë. Mund të vendosen vetëm cookies teknike të domosdoshme nga infrastruktura që e mban faqen (Cloudflare).

13. Ndryshimet e kësaj politike

Kur bëjmë ndryshime thelbësore, të njoftojmë brenda aplikacionit para se të hyjnë në fuqi. Data e përditësimit qëndron gjithmonë në krye të kësaj faqeje.

14. Kontakt

kontakt@getspika.app — për çdo pyetje, kërkesë apo ankesë rreth të dhënave të tua.
Fshirja e llogarisë: nga aplikacioni (Profili → Fshi llogarinë) ose te getspika.app/fshi-llogarine.